“Түлэгдлийн нөхөн сэргээх эмчилгээний дэмжлэг олгох төсөл”

Монгол Улс нь хүүхдийн түлэгдлийн ослын тоо өндөртэй орнуудын нэг юм.

Монгол уламжлалт гэр сууцны онцлог бүтэц, тасалгаануудын зааггүй байдал, хатуу түлшээр ажилладаг халаалтын систем зэрэг нь хүүхдүүдийг түлэгдлийн аюулд байнга өртөмтгий болгодог.

Гэмтэл Согог Судлалын Үндэсний төвийн  судалгаагаар 2024 онд нийт 4,823 түлэгдлийн тохиолдол бүртгэгдсэнээс 67% гаруй нь Улаанбаатар хотын захын дүүргүүдэд бүртгэгджээ. Түүнчлэн Баянзүрх болон Сонгинохайрхан дүүргүүд нь түлэгдлийн хохирол ихтэй бүс нутгаар тодорч байгаа ба эдгээр нь World Share Монгол дахь салбар төлөөлөгчийн газрын  гол зорилтот бүс нутаг юм.

Түлэгдсэн хүүхдүүдийн талаас илүү хувь нь санхүүгийн бэрхшээлээс үүдэн анхан шатны яаралтай тусламж эсвэл мэс заслын эмчилгээг цаг тухайд нь авч чаддаггүй байна. Хүүхдийн арьс насанд хүрэгчдээс нимгэн, мэдрэмтгий байдаг тул түлэгдэл нь хурдан, гүн гүнзгий тархах эрсдэлтэй. Хэрэв эхний шатны эмчилгээ хоцорвол сорви тогтож, бие махбодын гаж хөгжил, сэтгэлзүйн гүн хохирол үүсэх магадлал өндөр байдаг. Иймд хурдан хугацаанд үзүүлэх эмчилгээ, дараагийн шатны нөхөн сэргээх тусламж үйлчилгээ зайлшгүй шаардлагатай юм.

Ийм нөхцөл байдалд тулгуурлан World Share байгууллага нь Гэмтэл Согог Судлалын Үндэсний Төвтэй харилцан ойлголцлын санамж бичиг (MOU) байгуулан, Улаанбаатар хотын зорилтот бүлгийн түлэгдсэн хүүхдүүдэд чиглэсэн “Түлэгдлийн нөхөн сэргээх эмчилгээний дэмжлэг олгох төсөл“-ийг хэрэгжүүлж эхэллээ.

 2024 оны 1,708 хэвтэн эмчлүүлсэн түлэгдсэн иргэдийн 612 нь 18 наснаас доош хүүхэд бөгөөд тэдгээрийн 70 хувь нь 15 наснаас доош байна.

Энэхүү төсөл нь нийт 210 түлэгдсэн хүүхдийг хамарч, даралтат хувцас, эмчилгээний тос, тогтмол зөвлөгөө болон сэтгэлзүйн дэмжлэгийг олгох юм. Мөн сонгогдсон 20 зорилтот өрхөд ахуйн хэрэглээний бараа, эмнэлгийн хэрэгсэл зэргийг хамтад нь хандивлаж, орчны нөхцөлийг сайжруулах болно.

Үүнээс гадна, Улаанбаатар хотын улсын  ерөнхий боловсролын сургуулийн  100 өсвөр насны сурагчдад галын аюулаас урьдчилан сэргийлэх, аюулгүй байдлын талаарх сургалтуудыг зохион байгуулж байна.

Тус төсөл нь эмчилгээнд төвлөрөхөөс гадна урьдчилан сэргийлэлт болон боловсролыг хослуулсан цогц төсөл юм. Энэхүү төсөл  нь зөвхөн хүүхдийн бие махбодын болон сэтгэлзүйн нөхөн сэргээлтэд бус, гэр бүл, бүс нутгийн амьдралын чанарыг сайжруулах, эрүүл мэндийн тогтолцоог дэмжих зорилготой юм.

World Share төлөөлөгчийн газар  нь хүүхдүүдийн эрүүл, аюулгүй өсөх орчныг бүрдүүлэхийн төлөө цаашид ч тууштай ажиллах болно.