2025 оны зуны амралтын хугацаанд “Цөлийн сарнай” хүүхдийн асрамж халамжийн төв нь 8-р сарын 6-ний өдрөөс 8-р сарын 10-ний өдрийг хүртэл 4 шөнө, 5 өдрийн турш 29 сурагч, 6 багш буюу нийт 35 хүнтэйгээр дурсамж дүүрэн аялаад иржээ.
Энэ аяллын зорилго нь эх орноо хайрлах сэтгэлийг гүнзгийрүүлэх, байгалийн гоо үзэсгэлэнг мэдрэхийн зэрэгцээ оюун санааны өсөлт, сэтгэл зүйн тайвшрал, эрүүл биеийг төлөвшүүлэхэд чиглэсэн байлаа.
Аяласан газар нь байгалийн хосгүй үзэсгэлэнтэй Архангай аймаг байв.
Хүүхдүүд өөрсдөө майхан барьж, буулгаж, гадаа гал түлж хоолоо бэлтгэв. Мөн орон нутгийн музей, түүхэн дурсгалт газруудыг үзэж, тэдгээрийн үнэ цэнийг ойлгон, бие биедээ тусалж, насан туршдаа дурсах сайхан дурсамж бүтээжээ.
“Эрдэм” хүүхдийн асрамж, халамжийн төв нь 6-р сарын 15-ний өдрөөс 21-ний хооронд 30 гаруй хүүхэд, 2 багшийн хамтаар Тэрэлжид амарч, нүүдэлчдийн амьдрал, уламжлалт соёлыг судлан, сонирхолтой амралт өнгөрүүлжээ.
Гэрт амьдрах, шагайгаар наадах, морь унах, нум сум харвах зэрэг олон төрлийн сонирхолтой үйл ажиллагаа нь хүүхдүүдэд баяр баясгалан болж , Төв аймгийн Ногоон толгойн уудам ногоон талд морь унан давхиж эрх чөлөөг мэдрэв.
“Манай гэр” хүүхдийн асрамж, халамжийн төв нь 8-р сарын 7-ний өдөр Улаанбаатараас 65 км орчим зайд орших Төв аймгийн Ногоон толгойн баруун талын талбай руу нэг өдрийн аялал хийжээ.
Сэрүүн салхи, уудам ногоон хөндийд хүүхдүүд сэтгэл ханатал тоглож, нэг өдрийг инээд хөөрөөр дүүрэн өнгөрөөжээ.
Зуны дурсамж эдгээр үнэт мөчүүдийг бүтээхэд сэтгэлийн дэм, дэмжлэгээ харамгүй үзүүлсэн бүх хүмүүст чин сэтгэлийн талархал илэрхийлье.
Хүүхдүүд маань илүү өргөн ертөнцөд мөрөөдлөө тэлж, түүнийхээ төлөө урам зоригтойгоор урагшлахын тулд цаашид ч дулаан сэтгэл, урмаа хайрлаж байхыг хүсье!
0 Comments